Aik Kahani: Hajj ki qeemat

“Safiya, utho dekho chai aa gayee”

Siddiqui Sahab ne mujhe neend se jagaya toh jese mein yak dum se hosh mein aa gayee. Chai ki waqayi ashad zaroorat mehsoos ho rahi thi. Karachi Airport per aaj jitne lowg mein ne dekhe the itne lowg aik jaga per aik waqt mein kabhi nahi dekhe. Harr taraf lowg hi lowg aur sab ki aankhon mein aik ajeeb si chamak aik ajeeb sa ehsaas jese mano aik kabhi na khatam hone wali khushi hasil hone jaa rahi ho. Such hi toh hai, insaan ko zindagi mein hi Makke Madine ki ziyarat naseeb ho jaye aur murne se pehle Hajj ka moqa mil jaye toh iss se barh kar koi aur kiya chah sakta hai.

HajjFlight

“Mam, kitni shakar daloon” ? Air hostess ne poocha.

“Mujhe bagher cheeni ke de deejye ga please”. mein ne aahista se jawab diya, sar dard ke maare phatta ja raha tha.

Siddiqui Sahab Hajj Guide ko buhut dhiyan se parh rahe the. Shadi ke baad jo pehli aadat mein ne un ki note ki thi woh thi har cheez ki tahh mein jana aur jis bhi kaam ko thaan lein us ki poori planning kar ke us ko bil aakhir poora karna. Siddiqui Sahab jesa humsafar kam hi khawateen ko naseeb hota hoga, deen jin ka orhna bichona ho, ghar ki poori zimadari lete hoon aur bachon ki aik aik baat per poora dhiyan rakhna. Kabhi kabhi mein sochti hoon ke mere andar toh aisee koi khoobi na thi per yeh mere Khuda ki rehmat hai jo mujhe aisa shohar naseeb hua.

Jin dinon Siddiqui Sahab aik school mein teacher ki job kiya karte the aur hamara pehla beta abhi mahez aik saal hi ka tha tabhi unhoon ne mujh se poocha tha ke kiya mein apni Teaching ki job ko baad mein jaari rakhna chahti hoon, mein un ki dil ki baat samajh gayi thi aur mein ne bhi forun keh diya ke nahi ab meri aur mere bachoon ki har zimedaari aap ne hi uthani hai, aap bus ghar ki taraf se be fikar ho jaaye ke woh mera zimma hai. Siddiqui Sahab ne anthak mehnat karne ke baad aakhir e kaar Sarkari muhakme mein mulazmat haasil kar hi li aur zindagi buhut sukoon se guzarne lagi.

Mujhe aaj bhi yaad hai jab aik din Siddiqui Sahab ne mujh se pooacha ke meri zindagi ki sab se barri khuwahish kiya hai aur jese hi mein ne un ko bataya ke kuch aur nahi bus aik baar makke madine ki ziyarat naseeb ho jaye toh mere saath saath un ki ankhon mein bhi aansoo aa gaye the. Kehna asan tha shayad per zindagi ke jhameele nibhate nibhate itne saal kese kat gaye pata hi nahi chala. Bachiyoon ki shadiyan hum kam umri mein hi karna chahte the, pehli ki shadi 15 saal aur doosri ki 16 saal ki umar mein hi karwa ke un ko apne ghar ka kiya. Beton ki taleem ke akhrajat alag the, yeh sab karte karte salon lag gaye per dil ki khawahish dil mein hi zinda rahi.

Pechle saal barre bete ki shadi ke baad mein ne Siddiqui Sahab se poocha ke aap ko apna wada yaad hai. Unhoon ne khamoshi se gardan hilate hoi kaha ke “achi tarah yaad hai Safiya, yeh bhi koi bhoolne wali baat hai, tum bus dua karo ke yeh jo case aya hua hai office mein yeh hal ho jaye toh iss baar zaroor bandobast ho jaye ga”

“Kon sa case” ? mujh se raha nahi gaya

“kuch nahi aik zameen ka case hai, aik bhalla admi wahan building banana chah raha hai per kuch lowg masla kharra kiye hoi hain”

“Allah behter kare ga” mein ne dil hi dil mein duaein mangni shroo kar di theen
Aur aaj hum jahaz mein sawar us sar zameen ki taraf parwaz kar rahe hain jahan jana har musalman ki awaleen khawahish hoti hai. Siddiqui Sahab ne us zameen wale case per buhut mehnat se kaam kiya tha aur meri duayein bhi rang laayeen theen warna aik Clerk ki tankhwah mein toh shayad yeh khuwab kabhi bhi poora na ho pata.

“Sunye, iss mein Geo News kese lagana hai ?” Siddiqui Sahab ne air hostess ko awaz di. Khabrein sune bagher Siddiqui Sahab ko neend nahi aati, mein samjhi thi ke shayad aaj yahan is safar ke doran toh news se dur hi rahein ge per aisa nahi tha. Bachon ki tarah aik dum khush ho gaye the jese hi air hostess ne News channel laga ke de diya, dunya ne bhi kitni taraqi kar li hai ab aap hawa mein urrate waqt bhi TV dekh sakte hain.

Mujhe News se ajeeb uljhan hoti hai, aaye din kuch na kuch hota hi rehta hai, kabhi koi kisi ko maar deta hai toh kabhi kuch. Aur siyasat ke qise toh mere sar per se hi guzar jate hain per phir bhi hamare ghar mein news channel buhut dekha jata hai kiyoon ke hamare sabah zade bhi apne walid ke naqshe qadam per hi chal rahe hain.

TV pe phir kuch news bata rahe tha, shayad kisi khandan ne ijtemayee khud kushi kar li hai. Ab mera bhi tajassus barh raha tha, aik lachaar aur majboor beti ne apne boorhe maan baap ko zahar dene ke baad khud zahar pee ke khudh kushi kar li thi Karachi mein. Bata rahe the ke us ghareeb khandan ki koi Zameen ko le kar kuch masla tha aur kuch Builders ne rishwat khila kar woh zameen un se harrap li thi. Larrki ne marne se pehle khat bhi chorra tha jis mein us ne bataya tha ke zameen kho dene ke baad ab un ke paas kuch nahi bacha tha aur woh apni zindagi ka bhoj uthane ke qabil nahi rahe the.

“Ya Allah yeh hamare mulk ko kis ki nazar lag gayee hai, hum kahan jaa rahe hain. Ab lowgon ne halaat se majboor ho kar khud kahshiyan bhi shroo kar di hain, kiya bane ga aakhir is mulk ka”

“Mein Hajj ke doran zaroor us bachi aur us ke maan baap ki maghfarat ke liye dua karoon gi aur yeh bhi dua karoon gi ke Allah us bachi ko maaf kar de”

2 thoughts on “Aik Kahani: Hajj ki qeemat

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s